وەزارەتی كشتوكاڵی هەرێمی كوردستان دەڵێت، ئاستی ئاوی بەنداوەكانی هەرێمی كوردستان بەرزبووەتەوە، لە هەردوو بەنداوی دوکان و دەربەندیخان 19 ملیۆن مەتر سێجا ئاو گلدراوەتەوە و چەند بەنداوێكیش سەرڕێژبوون.
بەپێی راگەیەندراوێكی وەزارەتی كشتوكاڵی هەرێمی كوردستان كە ئەمڕۆ چوارشەممە بڵاویكردووەتەوە، لە ماوەی 24 كاتژمێردا هەردوو بەنداوی دوکان و دەربەندیخان 24 ملیۆن مەتر سێجا داهاتی ئاویان هەبووە، لەو بڕە 19 ملیۆن مەتر سێجا ئاو گلدراوەتەوە و بەشێک لە بەنداوە بچووکەکانیش سەرڕێژبوون.
وەزارەتی كشتوكاڵ ئاشكرایكردووە، “ئاستی ئاو لە چوار بەنداوە تازەکەی چەمرگە، دێوانە، تورەجار و خنس کە لە کۆتایی ساڵی 2022ـدا تەواوبوون بە رادەیەکی باش زیادیکردووە”.
