رێکخراوی پەیامنێران بۆ ماف و گەشەپێدان رایدەگەیەنێت، تا دێت رەوشی پەیامنێران پێدەنێتە قۆناغێکی مەترسیدارەوە و هێزە ئەمنیەکان رەچاوی کاری رۆژنامەوانی ناکەن و پەلاماری دەزگا میدیاییەکان دەدەن و کەلوپەلەکانیان لێ زەوت دەکەن و دەستگیریان دەکەن.
رێکخراوی پەیامنێران بۆ ماف و گەشەپێدان لە بەیاننامەیەکدا بڵاویکردەوە، ” ئەمڕۆ چوارشەممە لە گەڕەکی بەهاری نوێ لە شاری هەولێر هێزێکی زێرەڤانی هەریەک لە پەیامنێران (دیارحسێن لە تۆڕی میدیایی ئێستا و یاسر محمەد لە ئاژانسی وڵات میدیا ) بۆماوەی دوو کاتژمێر دەسگیرکران”.
ئاماژەی بەوەشکرد، “لە ماوەی رابردوودا لە هەولێری پایتەختدا بینیمان، رێژەی هێرشکردن و دەستگیرکردن و پێشێلکاری لە رێکخراوەکەمان تۆمارکران، ئەو پێشێلکارییانەی روودەدەن بە زەنگێکی مەترسیدار دەزانین لەسەر ژیانی رۆژنامەوانانی کوردستان”.
