قوباد تاڵەبانی جێگری سەرۆك وەزیرانی هەرێم لەگەڵ باڵیۆزی نوێی بەریتانیا لە عێراق كۆبووەوە و لەبارەی كێشەكانی نێوان هەرێم و بەغداد رایگەیاند، “ئاساییە ناكۆكی سیاسی هەبێت، بەڵام نابێت هاوڵاتییان باجی ئەو ناكۆكییانە بدەن و هۆكاری كێشەكانیش بۆ نەبوونی متمانە گەڕاندەوە، دەشڵێت، “هەموو هەوڵێك دەدەین بۆ ئەوەی ناكۆكییە سیاسییەكان و ئەو گرژییەی ئێستا لە وەزارەتی پێشمەرگە هەیە كاریگەری و رەنگدانەوەی لەسەر هەنگاوەكانی چاكسازی نەبێت”.
قوباد تاڵەبانی جێگری سەرۆك وەزیرانی هەرێم رایگەیاند، “ئەمڕۆ سێشەممە لەگەڵ ستیڤن چارڵس هیچن، باڵیۆزی نوێی بەریتانیا لە عێراق كۆبوومەوە و جەختمانكردەوە دەبێت هەموو لایەك پابەندبن بە جێبەجێكردنی یاسای بودجەوە تا مافی هەمووان پارێزراو بێت.
راشیگەیاند، بێمتمانەیی هۆكاری سەرەكی زۆربەی كێشە كەڵەكەبووەكانی نێوان هەرێم و بەغداد و هەروەها كێشە ناوخۆییەكانی هەرێمی كوردستانیشە، پێویستە لایەنە كوردستانی و عێراقییەكان لەپێناو دابینكردنی داهاتوویەكی باشتر بۆ كوردستان و عێراق هەوڵی گەڕاندنەوەی متمانەی نێوانیان بدەن و نابێت چیتر هاوڵاتییان باجی ناكۆكیی سیاسی و بێمتمانەیی نێوان لایەنەكان بدەن.
جێگری سەرۆك وەزیران راشیگەیاند، لە كۆبوونەوەكەدا باسمان لەوەش كرد، سوورین لەسەر جێبەجێكردنی چاكسازی لە وەزارەتی پێشمەرگە و هەموو هەوڵێكیش دەدەین تا ناكۆكییە سیاسییەكان و ئەو گرژییەی ئێستا هەیە كاریگەری لەسەر رێكخستنەوەی هێزەكانی پێشمەرگە نەبێت، بەڵام دەبێت لایەنەكانیش بەرپرسانە مامەڵە بكەن و نەمانگەڕێننەوە بۆ خاڵی سفر.
