بەڕێوەبەری گشتیی وەبەرههێنانی سلێمانی رایگەیاند، دەستکردن بە دروستکردنی یەکەی نیشتەجێبوونی کرێنشینان قۆناغە گرنگەکانی بڕیوە و تەنها چەند کێشەیەکی تەکنیکی ماوە.
عەزیز سەعید بەڕێوەبەری گشتیی وەبەرهێنانی سلێمانی بە تۆڕی میدیایی ئێستای راگەیاند، “دروستکردنی یەکەی نیشتەجێبوون بۆ کرێنشینان قۆناغە گرنگەکانی بڕیوە، شارەوانی سلێمانی زەویشی بۆ تەرخانکردین، بەڵام کێشەیەکی تێدا دروستبوو ئەویش ئەوەبوو شوێنەوار لە زەوییەکەدا دۆزرایەوە، ئێستا ئەو کێشەیەش چارەسەربووە”.
ئاماژەی بەوەشکرد، “دەتوانین بڵێین سەرجەم ئامادەکارییەکان تەواوبووە تەنها هەندێک کێشەی تەکنیکی ماون، هەر وەک پێشتر بڕیاری لێدرابوو لە رووی ژمارە و نرخی یەکەکانەوە هیچ گۆڕانکارییەکیان تێدا نەکراوە”.
باسیلەوەشکرد، “بەڵام لەرووی کاتەوە ناتوانین بە وردی بڵێین لەو کاتەدا دەست بە دروستکردنی دەکرێت چونکە هەندێک جار کێشە لەگەڵ بەڵێندەردا دروست دەبێت یان کێشەی دیکە دێنە پێشەوە”.
