قوباد تاڵەبانی جێگری سەرۆکی ئەنجومەنی وەزیران لەگەڵ سەرپەرشتیار و بەڕێوەبەرەکانی ئیدارەی سەربەخۆی گەرمیان رایگەیاند، “چیتر هیچ کەموکوڕی و کەمتەرخەمییەک لە جێبەجێکردنی کاروباری هاوڵاتییان و وەبەرهێنەران قبوڵ ناکرێت”.
ئەمڕۆ سێشەممە قوباد تاڵەبانی جێگری سەرۆکی ئەنجومەنی وەزیران لە شاری سلێمانی لەگەڵ سەرپەرشتیار و بەڕێوەبەرەکانی ئیدارەی سەربەخۆی گەرمیان کۆبووەوە و رایگەیاند، “پێویستە لە ماوەیەکی نزیکدا کێشە و گرفتەکانی پرۆژەکانی وەبەرهێنان لە سنوورەکە چارەسەربکرێن”.
هەر لە کۆبوونەوەکەدا قوباد تاڵەبانی ئاماژەی بە رەخنە و گلەییەکانی دانیشتوانی ئیدارەی گەرمیان و وەبەرهێنەران لە سستی بەڕێوەچوونی کاروبارەکان و کرد و هۆشداریدا کە چیتر هیچ کەموکوڕی و کەمتەرخەمییەک لە جێبەجێکردنی کاروباری هاوڵاتییان و وەبەرهێنەران قبوڵ ناکرێت.
باسیلەوەشکرد، “هەر بەرپرس و بەڕێوەبەرێک کەمتەرخەم بێت لە راپەڕاندنی کاروباری هاوڵاتییان، یان کێشە و گرفت لەبەردەم پڕۆژەکانی وەبەرهێنان دروست بکات، لێپرسینەوەی لەگەڵدا دەکرێت”.
لە بەشێکی دیکەی کۆبوونەوەکەدا باس لە پلانی قەربووکردنەوەی هەموو ئەو زەوییە کشتوکاڵیانە کرا کە دەکەونە ناو پرۆژەکانەوە لە سنووری کەلار و رزگاری، بڕیاریش درا کۆمپانیای جێبەجێکار بە زووترین کات دەستبکات بە دروستکردنی سایدی دووەمی شەقامی پشتێنەیی کەلار، رێکارەکانی کۆڕنیشی سەر رووباری سیروان تەواو بکرێن بۆ ئەوەی پڕۆژەکە دەستبەکاربێت.
