بەپێی بڕیارێکی وەزارەتی پەروەردەی ھەرێم، ئەو کەسانەی ھەڕەشە لەو بەڕێوەبەر و مامۆستایانە دەکەن، کە بایکۆتیان شکاندووە دەدرێنە دادگا.
لە راگەیەندراوێکدا وەزارەتی پەروەردە دەڵێت، “ماوەیەکە چەندین ھەژمار، پەیج و گروپ لە سۆشیال میدیا، کەوتوونەتە بێڕێزیکردن و سوکایەتی و ھەڕەشە لە چەندین بەڕێوەبەری قوتابخانە لە پارێزگای سلێمانی کە دەستیان بە دەوامکردن کردووەتەوە”.
ئاماژە بە ئەوەشکراوە، “وەزارەتی پەروەردە بە رەسمی دەزگای ئاسایشی کوردستانی لەو ھەڕەشە و بێڕێزیکردنە ئاگادارکردووەتەوە و رایگەیاندووە، کە سکاڵای یاساییان ھەیە و دەیانەوێت رووبەڕووی دادگایان بکەنەوە و قبوڵی ناکەن بەڕێوەبەر و مامۆستایان بیانەوێت درێژە بە خوێندن بدەن و سوکایەتییان پێبکرێت”.
وەزارەتەکە دەشڵێت، ئەگەر دەرکەوت ھەریەک لەوانە و ئەدمینی ئەو گروپانە پلەی مامۆستایەتیان ھەیە، ئەو پلەیان بە بڕیارێکی رەسمی لێوەردەگرنەوە.
ئەوە لە حاڵێکدایە، زیاتر لە مانگێک بەسەر ئەو وادەیەدا تێپەڕیوە کە وەک دەستپێکی ساڵی نوێی خوێندن لە هەرێم دیاریکرا، بەڵام مامۆستایان بەهۆی ئەوەی مووچەیان پێنەدراوە بایکۆتی هۆڵەکانی خوێندنیان کرد، دواتریش بەشێکی مامۆستایان گەڕانەوە هۆڵەکانی خوێندن.
