جێگری سەرۆكی فراكسیۆنی یەكێتی لە ئەنجومەنی نوێنەرانی عێراق رایدەگەیەنێت، لەسەر بنەمای پشكی هەرێم لە یاسای بودجە دەبێت حكومەتی هەرێم رۆژانە 400 هەزار بەرمیل نەوت و نیوەی داهاتی خاڵە سنوورییەكان رادەستی بەغداد بكات و لە بەرامبەردا مووچە و بودجەی بۆ رەوانە دەكرێت و دەبێت جارێكی دیكە مووچەی فەرمانبەرانی هەرێم دوانەكەوێت.
د. كەریم شكور جێگری سەرۆكی فراكسیۆنی یەكێتی لە ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، دوای پەسەندكردنی یاسای بودجە دەبێت هەرێم رێگاچارەیەك بدۆزێتەوە و رۆژانە 400 هەزار بەرمیل نەوت بفرۆشێت یاخود رادەستی حكومەتی عێراقی بكات و لەسەر بنەمای پشكی هەرێم لە بەغدادەوە بودجە و مووچە رەوانەی هەرێمی كوردستان دەكرێت.
ئاشكراشیكرد، یاسای بودجە بۆ ساڵی 2023 پەسەندكراوە و دەبێت جارێكی دیكە مووچەی فەرمانبەرانی هەرێم دوانەكەوێت و بەپێی یاساكە 27ی هەموو مانگێك مووچە و بودجە لە بەغدادەوە رەوانە بكرێت.
