بەهۆی فرۆشتنی جگەرەی ئەلیكترۆنی بەخوار تەمەن 18 ساڵ قائیمقامیەتی سلێمانی هەردوو فرۆشگای ناسر و محەمەد، لە شەقامی كاك ئەحمەدی شێخ بە فەرمانی قائیمقامی سلێمانی دادەخات و خاوەنەكانیشیان رووبەڕووی رێكاری یاسایی تونددەكاتەوە.
بەپێی راگەیەندراوێكی قائیمقامیەتی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، رێكان جەمار، سەرۆكی لیژنە هاوبەشەكانی قائیمقامیەتی سلێمانی رایگەیاند، پێشتر سەرجەم ماركێت، فرۆشتگا و شوێنانەكانی دیكە ئاگاداركراونەتەوە كە جگەرەی ئەلیكترۆنی بەخوار تەمەن 18 ساڵ نەفرۆشن، چونكە رووبەڕووی داخستن و رێكارە یاساییەكان دەكرێنەوە.
لە راگەیەندراوەكەدا هاتووە، لە ئەمڕۆوە هەر كەس و شوێنێك جگەرەی ئەلیكترۆنی بە خوار تەمەن 18 ساڵ بفرۆشێت لە رێگای دادوەری لێكۆڵینەوەی یەكی سلێمانییەوە پەڕاوی لێكۆڵینەوەی بۆ دەكرێتەوە و رووبەڕووی دادگا دەكرێتەوە.
سەرۆكی لیژنە هاوبەشەكانی قائیمقامیەتی سلێمانی ئاماژەی بۆ ئەوەش كرد، هیوادارین سەرجەم ماركێت و فرۆشتگاكان پابەندی مەرج و رێنماییەكانی كاركردن بن و جگەرەی ئەلیكترۆنی بە خوار تەمەن (18) ساڵ نەفرۆشن بۆ ئەوەی لەلایەن لیژنە هاوبەشەكانەوە رووبەڕووی رێكارە یاساییە توندەكان نەكرێنەوە.
