ئەمڕۆ محەمەد شیاع سودانی سەرۆك وەزیرانی عێراق، نوێنەرانی نۆ وڵاتی بانگێشتی بەغداد كرد بۆ تاوتوێكردنی پڕۆژەی “رێگای گەشەپێدان” و چۆنێتیی دەستكردن بە جێبەجێكردنی، راوێژكارەكەشی چەندین زانیاری لەبارەی پڕۆژەكەوە بۆ “ئێستا” ئاشكرادەكات.
هیشام ركابی راوێژكاری محەمەد شیاع سودانی سەرۆك وەزیرانی عێراق، زانیاریی وردی لەبارەی پڕۆژەكەوە بۆ تۆڕی میدیایی ئێستا ئاشكراكرد و وتی، “رێگای گەشەپێدان كە بڕیارە لە نێوان عێراق و توركیادا دروستبكرێت، وڵاتانی قەتەڕ، عوممان، ئیمارات، سعودیە، كوەیت، عێراق، ئوردن، سوریا و ئێران بە توركیا و ئەوروپاوە دەبەستێتەوە و بریتییە لە هێڵێكی ئاسنینی ئابوری بۆ گواستنەوەی كاڵا و شمەك و رێگایەكی خێرای هاتوچۆكردنی ئۆتۆمبێل و بارهەڵگرەكان”.
راشیگەیاند، “بودجەی تەرخانكراو بۆ پڕۆژەكە 17 ملیار دۆلارە، 10.5 ملیار دۆلاری بۆ راكێشانی هێڵی ئاسنینە و 6.5 ملیار دۆلاریش بۆ دروستكردنی رێگای خێرای هاتوچۆكردنی ئۆتۆمبێل و بارهەڵگر”.
لە لێدوانەكەیدا بۆ ئێستا، راوێژكارەكەی سودانی زانیاریی لەبارەی ناوەڕۆكی كۆبوونەوەكەی ئەمڕۆی بەغداد سەبارەت بە پڕۆژەی رێگای گەشەپێدان خستەڕوو و وتی، “وەزیرانی پەیوەندیداری وڵاتانی ئەنجومەنی هاریكاریی كەنداو و ئێران و سوریا و توركیا، بانگێشتی بەغداد كراون و لە كۆنگرەیەكی تایبەت بە پڕۆژەكە لەگەڵ سەرۆك وەزیراندا كۆبوونەوە”.
ئەو هێڵی شەمەندەفەری پڕۆژەی “رێگای گەشەپێدان” لەخۆیدەگرێت، درێژییەكەی 1200 كیلۆمەترە و بە 10 پارێزگای هەرێمی كوردستان و عێراقدا گوزەردەكات و شەمەندەفەرەكانی كارەبایی دەبن و بە تەكنەلۆژیای نوێ كاردەكەن. بەپێی وەزارەتی گواستنەوەی عێراق، پڕۆژەكە هەموو پێداویستی و تایبەتمەندییەكی سەردەم لەخۆدەگرێت و ئامانج لە جێبەجێكردنی، بەستنەوەی بەندەری فاوە بە توركیاوە، بەوەش هاتوچۆكردنی شەمەندەفەر و ئۆتۆمبێل و بارهەڵگرەكان لە بەسڕەوە تا توركیا دەستەبەردەكات و عێراق، وڵاتانی دەوروبەر و وڵاتانی كەنداو بە بازاڕەكانی ئەوروپاوە دەبەستێتەوە.
لە كۆنگرەكەی ئەمڕۆدا لە بەغداد، محەمەد شیاع سودانی سەرۆك وەزیران، بە وەزیر و نوێنەرانی وڵاتانی بەشداری وتووە، “ئەم پڕۆژەیە بە كۆڵەكەیەكی ئابوریی نانەوتی و خاڵێكی پێكەوە گرێدان دەبینین، كە خزمەت بە دراوسێكانی عێراق و ناوچەكە دەكات و روو لە تەواوكاریی ئابوری هەنگاودەنێت”.
لەبارەی هەمان پڕۆژەوە، لیژنەی گواستنەوە و ئابوری لە ئەنجومەنی نوێنەران ئەمڕۆ شەممە راگەیەندراوێكی بڵاوكردەوە و دەڵێت، “رێگای گەشەپێدان دەبێتە وەبەرهێنان بۆ وڵاتانی بەشدار و هەر وڵاتێكیش دەتوانێت بەشێكی پڕۆژەكە جێبەجێبكات و بەوەش لە ماوەی سێ بۆ پێنج ساڵدا تەواودەكرێت”.
