بڕیارە سبەینێ دووشەممە، ناونووسین بۆ مووچەی چاودێریی كۆمەڵایەتی و بەخێوكەری خاوەن پێداویستیی تایبەت دەستپێبكات و هاوڵاتییانی ناوچە دابڕاوەكانیش دەگرێتەوە.
بەپێی راگەیەندراوی وەزارەتی كار و كاروباری كۆمەڵایەتیی عێراق، ئەو كەسانەی شایستەی وەرگرتنی مووچەی چاودێریی كۆمەڵایەتی و بەخێوكەری خاوەن پێداویستیی تایبەتن و مەرجەكان دەیانگرێتەوە، سبەینێ دەتوانن بە شێوەی ئەلیكترۆنی ناوی خۆیان تۆماربكەن.
مووچەی ئەو دوو توێژە لە 225 هەزار دینارەوە دەستپێدەكات و تا 400 هەزار دینارە و هاوڵاتییانی ناوچە كوردستانییەكانی دەرەوەی ئیدارەی هەرێمیش دەگرێتەوە.
دوێنێ شەممە ئەحمەد ئەسەدی وەزیری كار و كارورباری كۆمەڵایەتیی عێراق، لەگەڵ لیژنەی دارایی لە ئەنجومەنی نوێنەران كۆبووەوە و راگەیەندراوی وەزارەتەكە ئاشكرایكردووە، پرسی زیادكردنی مووچەی چاودێریی كۆمەڵایەتی و خاوەن پێداویستییە تایبەتەكان تاوتوێكراوە.
مووچەی چاودێریی كۆمەڵایەتی دەدرێت بە كەمدەرامەتان، لەگەڵ ئەو كەسانەی ئەندامێكی خێزانەكەیان خاوەن پێداویستیی تایبەتە، بەپێی راگەیەندراوی وەزارەتی كار و كارورباری كۆمەڵایەتی، لە تاوتوێكردنی ئەوەدان مووچەی ئەو كەسانە و خاوەن پێداویستییە تایبەتەكان لە پڕۆژەیاسای بودجەی هەرسێ ساڵی 2023، 2024 و 2025ـدا زیادبكرێت.
