پۆلیسی دارستان و ژینگەی پارێزگای سلێمانی دەڵێت، سێ هاوڵاتییان لەسەر راوی ماسی لە قەزای دوکان دەستگیرکردووە.
دەستگیركردنەكە ئێوارەی ئەمڕۆ یەكشەممە بووە و كەمێك لەمەوبەر بەڕێوەبەرایەتیی پۆلیسی دارستان و ژینگەی پارێزگای سلێمانی رایگەیاند، دوای وەرگرتنی زانیاری، مەفرەزەیەکی بەشی پۆلیسى دارستان و ژینگەى دوکان دەرچوون بۆ سەر دەریاچەی دوکان بە مەبەستی پاراستنی سامانی ماسی و دەستگیرکردنی سەرپێچیکاران.
راگەیەندراوی بەڕێوەبەرایەتیی پۆلیسی دارستان و ژینگەی پارێزگای سلێمانی دەڵێت، “لە ئەنجامدا سێ هاوڵاتییان دەستگیرکرد کە سەرقاڵی راوکردن و چاکكردنی تۆڕ بوون، دەستیشگیرا بەسەر سێ تۆڕ و یەك ماتۆڕسکیلدا و پەڕاوی لێکۆڵینەوە رێکخراوە و رادەستی دادوەر کراوە بۆ گرتنەبەری رێکاری یاسایی”.
لە وەرزی بەهاردا راوكردنی ماسی لە رووبار و دەریاچە و بەنداوەكانی هەرێمی كوردستان قەدەغەدەكرێت و هۆكارەكەی زاوزێكردنی ماسییەكانە لەو وەرزەدا، بەڵام لە چەند رۆژی رابردوودا چەندین كەس بە تۆمەتی راوی نایاسایی دەستگیركراون.
