دووەم جارە سلێمانی گەشتە ئاسمانییەکانی لەگەڵ تورکیا رادەگیرێن، یەکەمیان بەهۆی سزادانی ریفراندۆمەکەی ساڵی 2017وە بوو کە گوایە بۆ سەربەخۆیی بوو، دووەم راگرتنی گەشتەکانی نێوان فڕۆکەخانەی نێودەوڵەتیی سلێمانی و تورکیا دوێنێ بوو بە بەهانەی ئەوەی یەکێتیی نیشتمانیی کوردستان هاوکاریی کوردستانی رۆژئاوای کوردستان دەکات، واتە بەهۆی “کوردایەتییەوە” گەشتەکانی سلێمانی راگیراون.
میدیایی فەرمیی یەکێتیی نیشتمانیی کوردستان بڵاویکردووەتەوە، خەباتی سیاسیی و دیپلۆماسیی و پێشمەرگایەتی شاخ و شاری یەكێتی بۆ ماف و كوردایەتی و لە پێناوی كوردستان دا، تەخت نەبووە، بۆیە ئامانجی سیاسیی یەكێتیی وەك هێزێكی سیاسیی بۆ خەباتی كوردستانییە كە ناویشی (یەكێتیی نیشتمانیی كوردستانی)یە و سەرۆكی یەكێتیش لە یەكەمین دیداری یەكێتییدا وتی، “یەكێتیی نیشتمانیی كوردستان، داش عیراق نییە، واتا لە هەر جێگە و پارچەیەكی كوردستان، جێگەی خەباتی یەكێتییە”.
دەڵێت، یەكێتیی نیشتمانیی كوردستان خەباتی بۆ سەرتاسەریی كوردستانە و هێزێكی كوردستانییە، خۆئەگەر تیرۆریستانی داعش مەترسییەكەی سەر كورد و كوردستان بێت، ئەوا یەكێتیی بۆ بەرەنگاربوونەوە ئامادەیە بە فریای پاراستنیەوە بچێت، وەك چۆن فریای هەولێر كەوت، فریای كۆبانێ لەكەوتن كەوت، ئەوا بۆ ئێستا و ئایندەش ئامادەیی فریای جێگاو پارچەكانی دیكەش بكەوێت و مەترسیی تیرۆریستانیان لێ دووربخاتەوە، ئەمەش پێی دەوترێت كوردایەتیی راستەقینە، نەك دروشمی كوردایەتیی موزەیەف و وەك هێزی دیكە پێچەوانەی كوردایەتی بكات و پێشڕەو بێت بۆ پەلاماری كورد و كوردایەتی.
ئاماژەی بەوەشکردووە کە پەرلەمانتارێكی كوردی پێشووی عیراق، وردبینیەكی بۆ ئەو راگرتنەی گەشتە ئاسمانییەكەی سلێمانی توركیا، كردووە و دەڵێت، “ئەنجومەنی ئاسایشی هەرێم بە بەیاننامەیەكی پێشوەختەوە هۆكاری سەرەكیی راگرتنی ئەو گەشتانە بووە”، وەك ئەوەی شكاتی لەلای توركیا بكات و هانی سزادانی بدات لەسەر ئەوەی دوو هێلێكۆپتەر كە شەڕڤانی تێدابووە بۆ ” ئۆپەراسیۆنی دژ بەداعش” هاتبن، بەڵام ئەو رووداوە خوڵقا، ئەدی شەڕی دژ بەداعش و هاوئاهەنگی كوردانە، خراپە، یان هەواڵگریی و راپۆرتدان و زەمینەسازی سزادانی شارێكی هەرێم و دواتریش نوقڵانەو كەیفخۆشی!! بۆیە پەرلەمانتارەكە بەمە دەڵێت، “ئەمە لێدانێكی گەورەیە لەئاسایشی نیشتمانی” كێش ئەمەی كرد ئەنجومەنی ئاسایشی هەرێم و هەواڵ و گەورەكردنی هەواڵە شكاتەكەش لە میدیای پارتییەوەن، یەكێتیش لەسەر كوردایەتی شكاتی لێكراوە و شوێنی شكاتەكەش كوردایەتی ناوێت، بەڵام هەواڵدەر چكارەیە! خۆ كوردایەتی پێناڵێن!
ئەمەش پێمان دەڵێت، “ئەم جۆرە كار و كوردایەتییەش، بە هەردوو بارەكەدا ئەوەی یەكێتیی كردی و دەیكات، ئەوەی باڵێكی پارتیش دەیكات” ئەلفێكە ، ئەو كوردەش كوردە ، ئەو ئەلفەی بەسە!.
