لەدوای ئەو بومەلەرزەیەی هەفتەی رابردوو هەرێمی کوردستانی هەژاند، وەزارەتی شارەوانی و گەشتوگوزاری هەرێم داوا دەکات پشکنین بۆ سەرجەم یەکەی نیشتەجێبوونەکان و باڵەخانە بازرگانییەکان بکرێت.
بەپێی نووسراوێکی وەزارەتی شارەوانی و گەشتوگوزار کە وێنەیەکی دەست تۆڕی میدیایی ئێستا کەوتووە داوا لە سەرجەم سەرۆکایەتی شارەوانیی پارێزگا و ئیدارە سەربەخۆکان کراوە، کە لیژنەیەکی هاوبەش لە شارەوانیی و بەڕێوەبەرایەتیی وەبەرهێنان پێکبهێنرێت و پشکنین بۆ یەکەی نیشتەجێبوون و باڵەخانە بازرگانییەکان بکرێت و هەڵسەنگاندنیان بۆ بکرێت.
هەر لە نووسراوەکەدا هاتووە، “بە مەبەستی راییکردنی کارەکانیان بە خێرایی دەتوانن لە یەک کاتدا چەند لیژنەیەک دروست بکرێن”.
