لە کۆبوونەوەی بەرەبەیانی ئەمڕۆی ئەنجومەنی نوێنەران بە زۆرینەی دەنگ هەمواری یاسای هەڵبژاردنی ئەنجومەنی پارێزگاکانی عێراق پەسەندکرا.
فەرمانگەی میدیای ئەنجومەنی نوێنەرانی عێراق بڵاویکردەوە، “لە دانیشتنی ژمارە 16 بەرەبەیانی ئەمڕۆی ئەنجومەنی نوێنەران دەنگ لەسەر هەمواری سێیەمی یاسای هەڵبژاردنی ئەنجومەنی پارێزگاکان درا و بە زۆرینەی دەنگ پەسەندکرا”.
لە دوای کۆتاییهاتنی دەنگدان بە هەمواری یاساکە، ئەنجومەنی نوێنەران دانیشتنەکەی بۆ کاتێکی نادیار هەڵگرت.
لە دوای چەندین جار دواخستن بەرەبەیانی ئەمڕۆ کۆبوونەوەی ئەنجومەنی نوێنەران بۆ دەنگدان لەسەر پرۆژە هەمواری یاسای هەڵبژاردنی ئەنجومەنی پارێزگاکان ئەنجامدرا، بەڵام بەهۆی ناکۆکی فراکسیۆنەکان لەبارەی هەمواری چەند ماددەیەکی ناو یاساکە کۆبوونەوەکە بۆ ماوەیەک دواخرا، دواتریش بە مەبەستی کۆنتڕۆڵکردنی دانیشتنەکە، محەمەد حەلبوسی داوای ئاسایشی پەرلەمان کرد ئەو پەرلەمانتارانە بکەنە دەرەوە کە ناڕازین و تەنگەژەیان لەناو هۆڵی کۆبوونەوەکە دروستکردووە.
