سەرۆكی ئەنجومەنی ئەوروپا لە پەیوەندییەكی تەلەفۆنیدا لەگەڵ سەرۆكی توركیا بڕیارەكانی ئەوروپای لەبارەی توندكردنی سزاكانی سەر وڵاتەكەی ئاگاداركردەوە و داوایكرد ئەنقەرە ڕوو لە گفتوگۆ بكات.
سەرچاوەیەكی دیپلۆماسی لە یەكێتی ئەوروپا ئەمڕۆ سێشەممە 15ی كانونی یەكەم ئاشكرایكرد، شارل میشێل، سەرۆكی ئەنجومەنی ئەوروپا ئەنجامەكانی كۆبوونەوەی لوتكەی ئەوروپا كە لە 10 و 11ی ئەم مانگە ئەنجامدرا بە ڕەجەب تەیب ئەردۆغان، سەرۆككۆماری توركیا ڕاگەیاندووە و جەختیشیكردوەتەوە لەسەر پێویستی كەمكردنەوەی بارگرژییەكان لە دەریای ناوەڕاست.
سەرچاوەكە وتیشی، میشێل داواشیلێكردووە “گفتوگۆكان لەگەڵ یۆنان دەستپێبكاتەوە و وتوێژەكانیش دەربارەی یەكلاكردنەوەی قوبرس بە چاودێری نەتەوەیەكگرتووەكان ئەنجامبدرێت”.
لوتكەی ئەوروپا بڕیاریدا سزاكانی سەر توركیا توندتر بكاتەوە بەهۆی كارەكانی لە دەریای ناوەڕاست، بەڵام یەكێتییەكە جێبەجێكردنی سزاكانی تا ئایاری داهاتوو دواخست و ئەو وادەیەی بەخشییە توركیا بۆ گۆڕینی هەڵوێستەكانی لە پرسی گەڕان بەدوای سەرچاوەكانی وزە لە دەریاكەدا و چارەسەركردنی كێشە هەڵپەسێردراوەكان لەگەڵ یۆنان و چالاككردنی ڕێڕەوی پرسی قوبرس.
