ئەگەر گراهام پۆتەرلە پۆستی ڕاهێنەری چێڵسی دووربخرێتەوە، زینەدین زێدان و لویس ئێنریکی پاڵێوراون بۆ جێگرتنەوەی.
بەهۆی ئەنجامە کارەساتبارەکانی چێڵسی-یەوە، پۆتەر لە “ستامفۆرد بریج” فشارێکی زۆری لەسەرە، لە (11) یاریدا تەنها سەرکەوتنێکی بەدەستهێناوە، لە ئەگەری بەردەوامبوونی شکستەکانیشدا گرێنتی بەردەوامبوونی لەدەستدەدات.
ڕۆژنامەی “دەیلی مەیڵ” ئاماژەی بەوە کردووە، دوو یاریی داهاتوو بەرامبەر لیدز یونایتد (پریمەرلیگ) و بوروسیا دۆرتمۆند (چامپیۆنزلیگ) ڕەنگە یەکلاکەرەوە بێت بۆ ڕاهێنەرەکەی پێشووی برایتۆن.
پۆتەر لەم وەرزەدا لە کۆی (26) یاری تەنها نۆ بردنەوەی تۆمارکردووە، وەک شوێنگرەوەشی، ئیدارەی تۆد بۆیلی بیر لە دوو ناوی گەورە دەکاتەوە کە پێکهاتوون لە، زینەدین زێدان و لویس ئێنریکی.
چێڵسی لە ڕیزبەندی دەیەمی خولی نایابی ئینگلیزی-دایە، لە یاریی چوونی قۆناغی (16)ی چامپیۆنزلیگیشدا بە دۆرتمۆند دۆڕاوە.
