لەگەڵ بەردەوامیی پرۆسەی گەڕان بە دوای ئەو کەسانەی لە ژێر داروپەردووی باڵەخانە رووخاوەکانی تورکیا و سوریا گیریان خواردووە، ژمارەی ئەو کەسانەی تا ئێستا گیانیان لەدەستداوە و تەرمەکانیان دۆزراوەتەوە 37 هەزاری تێپەڕاند.
سەرۆكایەتیی بەڕێوەبردنی كارەسات و دۆخی لە ناكاوی تورکیا بڵاویکردەوە، “ژمارەی ئەو کەسانەی لە بومەلەرزەکەی تورکیادا گیانیان لەدەستداوە گەیشتە 31 هەزار و 643 کەس و شەش هەزار و 444 بیناش بە تەواوی رووخاون”.
لای خۆیەوە نووسینگەی هەماهەنگی کاروباری مرۆیی سەر بە رێکخراوی نەتەوە یەکگرتووەکان ئەمڕۆ ئاشکرایکرد، “لە باکووری رۆژئاوای سوریا چوار هەزار 300 کەس گیانیان لەدەستداوە و زیاتر لە حەوت هەزار و 600 کەسیش برینداربوون.
بە وتەی مارتن گریڤس رێکخەری کاروبارەکانی نەتەوە یەکگرتووەکان، کارەکانی گەڕان بە دوای قوربانیانی بومەلەرزەکە لە کۆتایی نزیکبووەتەوە، لە ئێستادا پێویستمان بە دابینکردنی شوێن و خواردن و چاودێری دەروونی و کۆمەڵایەتیی ئەو کەسانەیە کە لە رووداوەکەدا رزگاریان بووە.
