محەمەد شیاع سودانی پاش گەیشتنی بە ئەنقەرە، لەلایەن رەجەب تەیب ئەردۆغانەوە پێشوازیی لێکرا و کۆبوونەوە.
بەپێی میدیا عێراقییەکان، محەمەد شیاع سودانی، سەرۆک وەزیرانی عێراق لە کۆبوونەوەکەیدا لەگەڵ رەجەب تەیب ئەردۆغان، سەرۆک کۆماری تورکیا، رایگەیاند، “تورکیا وڵاتێکی زۆر گرنگە بۆ ئێمە، دەمانەوێت پەیوەندییەکانی عێراق و تورکیا بەشێک بن لە هاوکێشەی سەقامگیریی ناوچەکە”.
وتیشی، رێگای گەشەپێدان بە سەرۆکایەتیی عێراق و تورکیا، یەکێکە لە گرنگترین پرۆژەکانی رۆژهەڵاتی ناوەڕاست.
هاوکات بەپێی راگەیەندراوێکی نوسینگەی سەرۆکی ئەنجومەنی وەزیرانی عێراق، سودانی سەرپەرشتیی رێوڕەسمی واژووکردنی چەند یاداشتێکی لێکتێگەیشتن لەگەڵ لایەنی تورکیا لە بوارە جیاجیاکاندا دەکات.
