یانەی ئارسیناڵ لە یاریگای خۆیدا، یاریی هەفتەی (23)ی خولی نایابی ئینگلیزی بەرامبەر برێنتفۆرد ئەنجامدا و یەکسانبوون باڵی بەسەر ئەنجامەکەدا کێشا.
ئەمڕۆ شەممە، لە چێوەی یارییەکانی هەفتەی (23)ی خولی نایابی ئینگلیزی “پریمەرلیگ”، یانەی ئارسیناڵ لە یاریگای “ئیماراتس” میوانداریی برێنتفۆردی کرد.
یارییەکە بە ئەنجامی (1-1) یەکسانبوون کۆتاییهات.
گۆڵەکەی “گانەرز” لە خولەکی 66 لەلایەن لیاندرۆ تروساردەوە تۆمارکرا، گۆڵی یەکسانکەرەوەی ئەنجامەکەش لە خولەکی 74 لەلایەن ئیڤان تۆنی-یەوە تۆمارکرا.
لە یارییەکی بەهێزی دیکەدا، یانەی لیستەر سیتی بە ئەنجامی چوار گۆڵ بەرامبەر بە گۆڵێک بەسەر یانەی تۆتنهام-دا سەرکەوت.
گۆڵەکەی “سپێرز” لە خولەکی 14 لەلایەن ڕۆدریگۆ بێنتانکۆرەوە تۆمارکرا، بەڵام لیستەر لە خولەکەکانی 23، 25، 45، 81دا چوار گۆڵی لە ڕێگەی نامپالیس مێندی، جەیمس مادیسۆن، ئیهانچیۆ، هارڤی بارنێسەوە تۆمارکرد و ئەنجامەکەی پێچەوانەکردەوە.
بەپێی ئەنجامە تۆمارکراوەکان، ئارسیناڵ ژمارەی خاڵەکانی گەیاندە (51) و لە پلەی یەکەمی ڕیزبەندیی یانەکانی ئینگلتەرا بەردەوامبوو، تۆتنهام بە (39) خاڵەوە لە پلەی پێنجەمدا مایەوە.
