ڕاپۆرتە ڕۆژنامەوانییەکانی ئەوروپا و تورکیا پشتڕاستیان کردەوە، کە کریستیان ئاتسو-ی هێرشبەری یانەی هاتای سپۆرت، بە زیندوویی لە ژێر داروپەردووی بینایەکی وێرانبوودا دۆزراوەتەوە و ڕزگارکراوە.
ڕۆژنامەکانی “دەیلی مەیڵ و ئابۆلا” ئاماژەیان بەوە کردووە، کە ئاتسو بە زیندووی دۆزراوەتەوە، بەڵام پێی ڕاستی برینداربووە و دووچاری هەناسەتوندی بووە، بەپەلە گەیەندراوەتە نەخۆشخانە.
International football player Christian Atsu has been found alive following Monday’s earthquake in southern Turkeyhttps://t.co/M3FciNN8fH
— CNN International (@cnni) February 7, 2023
لەو بارەیەوە فیدراسیۆنی تۆپی پێی گانا لە ڕاگەیاندراوێکدا نووسیویەتی، “هەندێک هەواڵی ئەرێنیمان پێگەیشتووە، کە کریستیان ئاتسو بە سەرکەوتوویی لەژێر داروپەردووی بینایەکی ڕووخاودا ڕزگار کراوە و چارەسەری بۆ دەکرێت. با بەردەوام بین لە نزاکردن بۆ یاریزانەکەمان.”
بەهۆی بومەلەرزە بەهێزەکەی تورکیا و سوریا ژمارەیەکی زۆر لە هاوڵاتیانی ئەو دوو وڵاتە لە ناوچە جیاجیاکان گیانیان لەدەستدا، ئەمە جگە لەوەی ژمارەیەکی زۆریش بریندار بوون.
ئاتسۆی تەمەن (31) ساڵ لە سەرەتای ئەم وەرزەدا لە یانەی ئەلڕائیدی سعوودییەوە پەیوەندی بە هاتای سپۆرەوە کرد، پێشتریش یاری بۆ یانەکانی پۆرتۆ، ڕیۆ ئاڤی، چێڵسی، ئێڤەرتۆن و بۆرنمۆس و مالاگا و نیوکاسڵ یونایتد کردووە.
