دەستەی دەستپاكیی عێراق دەڵێت، “لە وەقفی سوننیی سەڵاحەدیندا یەك ملیار و 571 ملیۆن و 800 هەزار دینار گەندەڵی كراوە و پارە بەهەدەر دراوە”.
فەرمانگەی لێكۆڵینەوەكان لە دەستەی دەستپاكیی عێراق ئەمڕۆ سێشەممە رایگەیاند، بەڕێوەبەری گشتیی وەقفی سوننی لە پارێزگای سەڵاحەدین و چوار فەرمانبەری دامەزراوەكە دەستگیركراون و تۆمەتبارن بە گەندەڵی.
بەپێی راگەیەندراوی دەستەی دەستپاكی، لە دیوانی وەقفی سوننیی سەڵاحەدیندا، یەك ملیار و 571 ملیۆن و 800 هەزار دینار گەندەڵی كراوە و پارە بەهەدەر دراوە، زیاتر لەو پارەیەش گەندەڵی لە دروستكردنی منارەی مزگەوتدا كراوە.
ئاشكرایكردووە، لە دروستكردنی 35 منارەی مزگەوتدا لە پارێزگای سەڵاحەدین پارە بەفیڕۆدراوە و بودجەی ناڕاست تەرخانكراوە، بە جۆرێك بۆ هەر یەكێك لەو 35 منارەیە 56 ملیۆن و 500 هەزار دینار تەرخانكراوە.
