رووداوەكانی پەلاماردانی هاوڵاتییان لە لایەن سەگە بێلانەكانەوە بەردەوامن، تەنها رۆژی یەكشەممە 22ـی كانوونی دووەم و تەنیا لە یەك شاردا كە موسڵە، سەگەكان پەلاماری نۆ منداڵیان داوە و برینداریانكردوون.
دكتۆر فەهەد سعود بەرپرسی بەشی فریاكەوتنی خێرایە لە نەخۆشخانەی گشتیی موسڵ و بە سكای نیوزی وتووە، نۆ منداڵی بریندار گەیەندراون بە بەشەكەیان كە سەگی بێلانە گەستوویانن و سیان لە منداڵەكان لە دۆخێكی تەندروستیی ناجێگیردان.
بەپێی وتەی سعود، هێرشی سەگەكان بۆ سەر منداڵەكان هێندە توند و دڕندانە بووە، سەگ كەڵبەكانی لە سەر، رووخسار و شەویلگەی منداڵێك گیركردووە و زۆربەی شوێنەكانی سەر و دەموچاوی برینداربوون.
ئەم رووداوانە كاردانەوەی فراوانیان لە تۆڕە كۆمەڵایەتییەكاندا بەدوای خۆیاندا هێناوە و وەك بەشێك لە هاوڵاتییان خۆیان دەڵێن، سەگە بێلانەكان ترس و دڵەڕاوكێی زۆریان لەناو خەڵكدا بڵاوكردووەتەوە.
