یانه‌ی ئارسیناڵ یاریی هەفتەی (21)ی خولی نایابی ئینگلیزی به‌رامبه‌ر مانچستەر یونایتد ئه‌نجامدا، یارییەکە بە بردنەوەی ئارسیناڵ کۆتاییهات.
ئەمشه‌و یەکشەممە، لە چێوەی یارییەکانی هەفتەی (21) خولی نایابی ئینگلتەرا “پریمه‌رلیگ”، یانەی ئارسیناڵ له “ئیماراتس” میوانداریی یانه‌ی مانچستەر یونایتدی کرد.
یارییەکە بە ئه‌نجامی سێ گۆڵ بەرامبەر بە دوو گۆڵ لە بەرژەوەندیی ئەستێرەکانی مایکڵ ئارتێتا کۆتاییهات.
گۆڵه‌کانی “گانەرز” له خوله‌کەکانی 24، 53، 90 له‌لایه‌ن ئیدواردۆ نیکیتا (دوو گۆڵ) و بوکایۆ ساکا-وە تۆمارکران، گۆڵەکانی “ڕێد دێڤڵز”یش لە خولەکەکانی 17، 59 لەلایەن مارکۆس ڕاشفۆرد و لیساندرۆ مارتینێزەوە تۆمارکران.
بەپێی ئەنجامە تۆمارکراوەکە، ئارسیناڵ به کۆکردنه‌وه‌ی 50 خاڵ لە پله‌ی یەکەمی ڕیزبه‌ندیی یانه‌کانی پریمه‌رلیگ جێگیر بوو، لە بەرامبەردا مانچستەر یونایتد بە 39 خاڵەوە لە پلەی چوارمدا کێبڕکێی نیوکاسڵ دەکات کە هەمان ژمارەی خاڵی کۆکردووەتەوە.
