بەڕێوەبەرایەتیی گشتیی چاودێریی بازرگانیی سلێمانی باس لە گرانبوونی بەشێک لە کاڵا و کەلوپەلەکان دەکات و یەکێک لە هۆکارە سەرەکییەکان بۆ بەرزبوونەوەی نرخی دۆلار دەگێڕێتەوە.
لە لێدوانێکدا بۆ تۆڕی میدیایی ئێستا سۆران عەبدولغەفوور بەڕێوەبەری چاودێریی بازرگانیی سلێمانی رایگەیاند، کاڵاکان بەشێکیان بەهۆی بەرزبوونەوەی نرخی دۆلارەوە گرانبوون کە هۆکارێکی سەرەکیی گرانییە لە بازاڕدا.
باسی لە گرانبوونی گۆشت و هێلکە کرد وەک دوو کاڵای سەرەکی و رایگەیاند، هێلکە بەهۆی گرانبوونی عەلەف و گازەوە گرانبووە، هەر تۆنێک عەلەف لە 470 دۆلارەوە بەرزبووەتەوە بۆ 540 دۆلار، ئەمە دوو جار نرخەکەی بەرزبووەتەوە لەسەر وەبەرهێنەر، چونکە نرخی دۆلاریش لە هەمانکاتدا بەرزبووەتەوە.
ئاماژەی بەوەکرد، بەرزبوونەوەی نرخی گۆشتیش بە هەمانشێوە پەیوەندیدارە بە گرانبوونی عەلەف و بەرزبوونەوەی نرخی گۆشت و ئاژەڵەکان بە زیندووی ئەوەش لە هەمانکاتدا دەگەڕیتەوە بۆ بەرزبوونەوەی نرخی دۆلار.
سەبارەت بە نرخی کاڵا و کەلوپەلەکانی دیکە رایگەیاند، بەهۆی ئەوەی کاڵاکانی دیکەی وەک برنج، رۆن، شەکر و شتومەکی دیکە بە نرخی پێشووی دۆلار کڕدراون و تا ئێستاش هەر ئەوانەن لەناو بازاڕدا بۆیە نرخیان بەرزنەبووەتەوە.
هاوڵاتییانیشی لەوە دڵنیاکردەوە کە بەردەوام چاودێریی نرخەکان دەکەن و لە هەر شوێنێک گرانفرۆشی بکرێت راستەوخۆ دایدەخەن.
