پارێزگاری هەولێر دەستخۆشی لە فەرمانگە جۆراوجۆرەكان دەكات و دەڵێت، سەرى ساڵى نوێ بەبێ بوونى هیچ کێشەیەکى ئەوتۆ بەڕێکرا.
ئومێد خۆشناو، پارێزگاری هەولێر راگەیەندراوێكی بڵاوكردەوە و تیایدا دەستخۆشی لە قائیمقامیەت و یەکە کارگێڕییەکانى سنوورى پارێزگاکە و هێزە ئەمنییەكان دەكات بۆ بەجێگەیاندنی ئەرکەکانیان لە پاراستنى تەواوى شوێنە گشتییەکان و ئەو جێگایانەی كە هاوڵاتییان و گەشتیاران بۆ بەسەربردنی دواساتەکانی شەوى سەرى ساڵ روویان لێکردبوو.
هەروەها دەستخۆشی لە تیمەکانى بەڕێوەبەرایەتى گشتیى گەشتوگوزارى هەولێر دەكات بۆ خزمەتکردنى گەشتیاران و میوانان و هاوڵاتییان، هەروەها تیمەکانی شارەوانى و فەرمانگەی ژینگەپارێزی، کە لە رۆژى دواى سەرى ساڵ سەرەڕای پشووى فەرمانگەکانیان تەواوی ئەو شوێن و جێگە گشتیانەی شاریان پاککردەوە کە بەهۆی پاشماوە و زبڵ و خاشاکی شەوی سەرى ساڵ پیس ببوون.
پارێزگاری هەولێر سوپاس ئاراستەی میوان و گەشتیارانى ناوەڕاست و خوارووى عێراق و وڵاتانى دیكە و هاونیشتیمانیان دەكات کە “هاوکار و هەماهەنگ بوون و سەرى ساڵى نوێ بەبێ بوونى هیچ کێشەیەکى ئەوتۆ کە شایەنى باسکردن بێت، بەوپەڕى ئارامى و لە کەشێکى پڕ لە خۆشى بۆ هەموو لایەک ئەو یادە بەڕێکرا”.
