رێکخراوی کۆچی نێودەوڵەتی دەڵێت، بەھۆی وشکەساڵییەوە زیاتر لە 10 ھەزار خێزانی دانیشتووی پارێزگاکانی ناوەڕاست و باشووری عێراق بەرەو ناوچەی دیكە کۆچیانکردووە.
وشکەساڵی و گۆڕانی ئاووھەوا و كەمبوونەوەی رووبەرە شێدار و كشتوكاڵییەكان و پەرەسەندنی دیاردەی بە بیابانبوون، ئەو هۆكارانەن كە خەڵكیان ناچاری كۆچكردن كردووە و وەك راپۆرتی رێکخراوی کۆچی نێودەوڵەتی ئاشكرایكردووە، سەدان خێزان توانای دەستەبەركردنی خۆراكی پێویستیان نییە.
بەپێی راپۆرتەكە، 10 ھەزار و 464 خێزان لە 10 پارێزگای ناوەڕاست و باشووری عێراقەوە کۆچیانکردووە بۆ شوێنانی دیكە. زیاتر لە نیوەی ئەو خێزانانەی لە پارێزگایەكی وەكو بەسڕە کۆچیانکردووە دەڵێن، ناتوانن خۆراکی پێویست دەستەبەربكەن و دۆخی داراییان لە خراپیدایە.
وشکكردنی چەندین سەرچاوەی ئاوی و بەرزبوونەوەی رێژەی سوێریی خاك و كەمبوونەوەی ناوچە شێدارە بە پیتەكان لە ساڵانی رابردوودا، كاریگەرییان لەسەر ژیانی بەشێك لە دانیشتووانی دیالە و ناوچەكانی نزیك زۆنگاوەكانی باشووری عێراق هەبووە، بەڵام بەپێی كەشناسی، ئەمساڵ عێراق مەترسیی وشكەساڵیی تێپەڕاندووە و بووژانەوەی ئاو و خاكەكەی تا كۆتایی وەرزی دابارین چاوەڕوانكراوە.
