ئەمڕۆ دۆلار بەرزترین ئاستی تۆماركرد و لە دوای كەمكردنەوەی بەهای دینار بەرامبەر بە دۆلار، بەرزترین نرخە دۆلار پێیگەیشتبێت.
لەگەڵ كردنەوەی بازاڕی دراودا، ئەمڕۆ پێنجشەممە 100 دۆلاری ئەمریكی بە 151 هەزار و 750 دینار بوو، كەمێك لەمەوبەر بەهای 100 دۆلار 700 دیناری چووەسەر و گەیشتە 152 هەزار و 450 دیناری عێراقی.
لە ماوەی دوو هەفتەدا و هاوكاتی ئەوەی كە بەهای دۆلار زیاتر هەڵكشاوە، بانكی ناوەندیی عێراق چەند جارێك لە رێگەی كاربەدەستەكانییەوە جەختیكردووەتەوە لەوەی رێكار دەگرێتەبەر و هاوسەنگی بۆ بازاڕی دراوەكان دەگەڕێنێتەوە و بەهای دۆلار جێگیردەكاتەوە، بەڵام رۆژ بە رۆژ دینار بەرامبەر بە دۆلار زیاتر بەهاكەی لەدەستدەدات.
لە ماوەی رابردوودا، بانكی ناوەندیی عێراق فرۆشی هەفتانەی دۆلاری كەمكردەوە و بەشێك لە بانكەكانی لە بەدەستهێنانی دۆلار بێبەشكرد، بەوەش گۆڕانكاری لە نرخەكاندا روویدا و بەهای دۆلار بەرزبووەوە.
