عەمار حەكیم داوا لە سەرۆك كۆمار دەكات گرفتە هەڵواسراوەكانی نێوان هەردوو حكومەتی ناوەندی و هەرێمی كوردستان چارەسەربكرێن.
لەتیف رەشید سەرۆك كۆماری عێراق و عەمار حەكیم سەرۆكی رەوتی حیكمە كۆبوونەوە، بەپێی راگەیەندراوێك، پەرەسەندنەكانی دۆخی سیاسی لە عێراق و ناوچەكە و گەڕاندنەوەی رۆڵی كاریگەری عێراق تاوتوێكراون و هەردوولا داوای یەكڕیزییان كردووە.
نووسینگەی حەكیم دەڵێت، سەرۆكی رەوتی حیكمە داوای لە سەرۆك كۆمار كردووە، بەردەوامی بدات بە گفتوگۆ لە پێناو تێپەڕاندنی گرفتە هەڵواسراوەكان لە نێوان هەردوو حكومەتی ناوەندی و هەرێمی كوردستاندا.
بەپێی راگەیەندراوەكە، عەمار حەكیم داوایكردووە گرفتەكان چارەسەربكرێن و بەرژەوەندیی نیشتمانی لەبەرچاوبگیرێت و هەمووان لە پێناو بەرژەوەندیی عێراقدا سازشبكەن، رۆڵی ئەنجومەنی نوێنەران كارابكرێت و یاسای گرنگ دابڕێژرێن.
