کۆمسیۆنی باڵای سەربەخۆی هەڵبژاردنەکان رایدەگەیەنێت، بۆ هەڵبژاردنی داهاتووی ئەنجومەنی نوێنەرانی عێراق 38 هاوپەیمانێتی لەنێوان هێز و لایەنە سیاسییەکان پێکهێنراون و لە وادەی خۆیدا تۆمارکراون.
عیماد جەمیل سەرۆکی تیمی راگەیاندنی کۆمسیۆنی باڵای هەڵبژاردنەکان رایگەیاند، تۆمارکردنی لیست و هاوپەیمانێتییەکان بۆ هەڵبژاردنی داهاتوو کۆتاییهاتووە، لە ئێستادا قۆناغی وردبینیکردن بۆ ناوەکان دەستیپێکردووە.
ئاماژەی بەوەشکرد، لەئێستا وردبینیکردنی ناوەکان لە ئۆفیسەکانی کۆمسیۆن دەستیپێکردووە، دواتر دەنێردرێن بۆ لایەنە و دەزگا پەیوەندیدارەکان بە مەبەستی دڵنیابوونەوە لە شیاوبوونیان بۆ بەشداری لە هەڵبژاردنەکان.
جەختیشیکردەوە، تا کۆتاییهاتنی تۆمارکردنەکە 38 هاوپەیمانێتی تۆمارکراون، لە ئایندەیەکی نزیکدا ناو و ژمارەی لیست و کاندید و حزبە سیاسییەکانی بەشدار لە هەڵبژاردنەکاندا بڵاودەکەینەوە.
