بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد چاویکەوت بە سەید عەمار حەکیم، سەرۆکی رەوتی حیکمە.
لە دیدارێکدا گۆڕانکارییە سیاسییەکان و هەوڵەکانی سەرخستنی پڕۆژەی چاکسازی و پشتیوانیی لایەنە سیاسییەکان بۆ جێبەجێکردنی بەرنامەکانی حکومەت گفتوگۆیان لەبارەوە کرا.
لە دیدارەکەدا هەردوولا جەختیان لە یەکخستنی هەوڵەکان کردەوە لە پێناو دروستکردنی کۆدەنگیی نیشتمانی بۆ چارەسەرکردنی ریشەییانەی کێشەکانی نێوان هەرێم و بەغداد و پاراستنی مافەکانی گەلی کورد لە چێوەی دەستووردا.
سەرۆک بافڵ جەلال تاڵەبانی پەرۆشیی یەکێتیی بۆ تەبایی و یەکهەڵوێستیی نێوان لایەنەکان دووپاتکردەوە و رایگەیاند، ئامانجی ئێمە کاری پێکەوەیی و هەوڵدانە لە پێناو پاراستنی سەقامگیری و بونیادنانی داهاتوویەکی پرشنگدار. ئەو بەرنامەیەش کە پێشکەشمان کردووە و خاڵەکانی لە کارنامەی حکومەتدا جێگیرکراون، لە پێناو بەدیهێنانی ئەو ئامانجە باڵایەدایە کە لە پێشکەشکردنی خزمەتگوزاری، رووبەڕووبوونەوەی گەندەڵی، یەکسانی و پارێزگاریکردن لە مافی هەموواندا خۆی دەبینێتەوە.
