حكومەتی هەرێم رایدەگەیەنێت، تا وەكو ئێستا زیاتر لە 21 ملیۆن لیتر نەوتی سپی بەسەر هاوڵاتییاندا دابەشكراوە و نزیكەی 107 هەزار خێزان لێی سوودمەندبوون.
بەپێی راگەیەندراوێكی فەرمانگەی میدیا و زانیاریی حكومەتی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، لە ڕێگای وەزارەتی سامانە سروشتییەكانەوە، دابەشكردنی نەوتی سپی بەسەر هاوڵاتییاندا لە زۆربەی ناوچە شاخاوییەكاندا بەڕێوەچووە و 28 ملیۆن و 560 هەزار و 243 لیتر نەوتی سپی دابینكراوە.
ئاماژە بۆ ئەوەش كراوە، لەو بڕە نەوتەی دابینكراوە، بڕی 21 ملیۆن و 351 هەزار و 600 لیتر بەسەر 106 هەزار و 758 خێزاندا لە ناوچە جیاوازەكانی هەرێمی كوردستان دابەشكراوە.
لە راگەیەندراوەكەدا هاتووە، لە پارێزگای هەولێر بڕی هەشت ملیۆن و 492 هەزار و 640 لیتر نەوتی سپی دابینكراوە و لەو بڕەش حەوت ملیۆن و 481 هەزار لیتری بەسەر 37 هەزار و 405 خێزاندا دابەشكراوە.
هاوكات لە پارێزگاكانی سلێمانی و هەڵەبجەش بڕی نۆ ملیۆن و 159 هەزار لیتر دابین كراوە و تاوەكو ئێستاش بڕی پێنج ملیۆن و 149 هەزار لیتر بەسەر پێنج هەزار و 149خێزاندا دابەشكراوە.
لە پارێزگای دهۆكیش بڕی 10 ملیۆن و 917 هەزار و 603 لیتر دابینكراوە و لەو بڕەش هەشت ملیۆن و 721 هەزار و 600 لیتری بەسەر 43 هەزار و 608 خێزاندا دابەشكراوە.
