پۆلیسی هەولێر وردەكاریی كوشتنی كەسێك لەلایەن برایەكی بچوكی خۆیەوە ئاشكرادەكات و دەڵێت، هەردووكیان بەكارهێنەری ماددەی هۆشبەر بوون.
هۆگر عەزیز، وتەبێژی پۆلیسی هەولێر لە كۆنگرەیەكی رۆژنامەوانیدا رایگەیاند، كاتژمێر 1:30 خولەكی بەرەبەیانی ئەمڕۆ هێزەكانیان لە بوونی رووداوێكی كوشتن لە گەڕەكی تەیراوە نزیك گازینۆی (كورد و عەرەب) ئاگاداركرایەوە.
وتیشی، “دوای گەیشتنی تیمێكی هێزەكانی پۆلیس و ئەنجامدانی لێكۆڵینەوە دەركەوت كەسێك بەناوی (جێگر رێگر مستەفا) تەمەن 21 ساڵ لە نێو ئۆتۆمبێلێكی جۆری كیا/ سپۆرتاج كوژراوە”.
پاش بەدواداچوون دەركەوت تۆمەتبار و بكەری تاوانەكە برایەكی خۆیەتی بەناوی (ج. رێگر مستەفا) تەمەن 19 ساڵ و، دوای پێنج كاتژمێر لەلایەن هێزەكانی پۆلیسەوە دەستگیركرا، هۆگر عەزیز وای وت.
ئەوەشی خستەڕوو، لەنێو كەلوپەكانی كوژراودا چەندین كەرەستە و ماددەی قەدەغەكراو دەستی بەسەرداگیرا، كەچی كڵاشینكۆف و ژمارەیەك فیشەك، دەمانچە و شەش فیشەك. هەروەها ماددەی هۆشبەری جۆری (كریستاڵ، جامایكا، تریاك و هیرۆین) و تەرازوو و كەرەستەی كێشانیان.
وتەبێژی پۆلیس روونیشیكردەوە، هەریەك لە بكوژ و كوژراو بەكارهێنەر و فرۆشیاری ماددەی هۆشبەر بوون.
ئەوەشی ئاشكراكرد، تاوانەكە بە چەكی كڵاشینكۆف ئەنجامدراوە كە هی كوژراو بووە و لەلایەن براكەیەوە 11 فیشەكی پێوەنراوە و پاڵنەرەكەشی كێشەی خێزانی بووە.
