ڤایرۆسی ئیبۆلا لە دوو ناوچەی ئۆگەندا بڵاوبووەوە و بەو هۆیەشەوە حکومەتی وڵاتەکە قەدەغەی هاتوچۆی ڕاگەیاند.
یۆری مۆسیفینی، سەرۆکی ئۆگەندا ڕایگەیاند، قەدەغەی هاتوچۆ لەو ناوچانە ڕادەگەیەنین کە ڤایرۆسەکەی تێدا بڵاوبووەتەوە تا دۆخەکە ئاسایی دەبێتەوە.
بە پێی ئامارەکانی وەزارەتی تەندروستی ئۆگەندا، لە دوای ڕاگەیاندنی بڵاوبوونەوەی ڤایرۆسی ئیبۆلا لە 20 ی مانگی ڕابردوو لە وڵاتەکەدا تا ئێستا 19 کەس مردوون و 58 کەسی دیکەش وەک تووشبوو تۆمارکراون.
ڤایرۆسی ئیبۆلا لە ناوەڕاستی ئۆگەندا و لە هەردوو ناوچەی مۆبیندی و کاساندا بڵاوبووەتەوە، بەڵام تا ئێستا نەگەیشتووەتە پایتەختی وڵاتەکە.
ڕاگەیاندنی قەدەغەی هاتوچۆی ئەو دوو شارە بۆ ماوەی 21 ڕۆژە، سەرجەم بازاڕەکان و شوێنە ئاینییەکان دادەخرێن و گەشتەکان هەڵدەوەشێنەوە و لە شەوەوە تا بەرەبەیان قەدەغەی هاتوچۆ دەکرێت.
