ئەنجومەنی سەركردایەتیی كۆمەڵی دادگەریی بڕیاریدا پرسی چارەنووسی فراكسیۆنەكەی لە پەرلەمانی كوردستان لە كۆبوونەوەی گشتییدا یەكلابكاتەوە كە بڕیارە لە چەند ڕۆژی داهاتوودا بەڕێوەبچێت.
ئەمڕۆ شەممە، ئەنجومەنی سەركردایەتیی كۆمەڵی دادگەریی كۆبووەوە و لەبارەی پرسی درێژكردنەوەی تەمەنی پەرلەمانی كوردستان، ڕایگەیاند، كۆمەڵ بەردەوام نەیاری ئەوە بووە ماوەی یاسایی پەرلەمان درێژبكرێتەوە و كاری بۆ ئەوەشكردووە ھەڵبژاردن لە كاتی خۆیدا ئەنجامبدرێت، بەڵام بە داخەوە بە مەبەست خەمساردییان كردووە و ئامادەكارییان نەكرد كە هەڵبژاردن ئەنجامبدرێت و تەمەنی پەرلەمان درێژكرایەوە.
لە ڕاگەیەندراوەكەی كۆمەڵی دادگەرییدا هاتووە، ئەنجومەنی سەركردایەتی بە تێروتەسەلی پرسی درێژكردنەوەی تەمەنی پەرلەمان و ھەڵوێستی ڕایگەیاند و بڕیاریدا ئەو پرسە لە دەسەڵاتی كۆبوونەوەی گشتیدا بەپێی پەیڕەوی ناوخۆ یەكلابكرێتەوە كە بڕیارە لە ڕۆژانی ئایندەدا كۆبوونەوەكە ئەنجامبدرێت.
