ڕۆژی 15ی تشرینی یەكەم، وەك ڕۆژی جیهانیی دەستشتن دیاریكراوە، ڕێكخراوە تەندروستییەكان داوادەكەن مرۆڤەكان زیاتر دەستەكانیان بشۆن.
ڕۆژە جیهانییەكە 14 ساڵ پێش ئێستا دەستنیشانكراوە و ساڵانە وەك نەریتێك بۆ زیاتر بڵاوكردنەوەی هۆشیاری لەبارەی گرنگیی شۆردنی دەستەكانەوە، ڕێوڕەسم و چالاكیی بۆ ڕێكدەخرێت.
ئەمڕۆ شەممە هاوكاتی یادكردنەوەی ڕۆژی جیهانیی دەستشتن، ڕێكخراوەكانی تەندروستی لەسەر ئاستی جیهان داوادەكەن منداڵان هانبدرێن دەستەكانیان بشۆن و پارێزگاری لە پاك و خاوێنییان بكەن و هانی گەورەكان دەدەن ڕۆژانە چەندین جار بە سابون و هۆكاری پاكژكەرەوە دەستەكانیان خاوێنبكەنەوە.
ڕێكخراوەكانی بواری تەندروستی، شۆردنی دەستەكان و هێشتنەوەیان بە پاك و خاوێنی، بە هۆكاری خۆپاراستن لە نەخۆشی و ڕزگاركردنی ژیانی مرۆڤ لە پەتا و نەخۆشیی كوژەر ناودێردەكەن.
