سەرۆكی ئاژانسی پاراستن و زانیاری/ زانیاری ناوچە سنوورییەكانی پێنجوێن و شارباژێر بەسەردەكاتەوە و بەدواداچوون بۆ رێوشوێنەكانی رووبەڕووبوونەوەی پێشێكارانی یاسا و رێگری لە قاچاخچێتی دەكات.
جەلال شێخ ناجی، سەرۆکی ئاژانسی پاراستن و زانیاری/ زانیاری بە یاوەری ھیوا ئەحمەد، بەڕێوەبەری ئاسایشی پارێزگای سلێمانی، ئەمڕۆ ھێزەکانی ئاسایش و پاسەوانی سنووریان لە ناوچە سنوورییەکانی پێنجوێن و شارباژێر بەسەرکردەوە.
لەمیانەیەدا لە نزیکەوە بەدواداچوونیان کرد بۆ رێوشوێنە ئەمنییەکان و پلان و بەرنامەکانیان بۆ جێبەجێکردنی یاسا و رێنماییەکانی دەسەڵاتی دادوەری و حکومەت بۆ رووبەڕووبوونەوەی پێشێلکارانی یاسا و رێگریکردن لە قاچاخچێتی.
لەمیانی ئەو بەسەرکردنەوانەدا سەرۆکی ئاژانسی پاراستن و زانیاری/ زانیاری و بەڕێوەبەری ئاسایشی سلێمانی وێڕای گەیاندنی دەستخۆشی و دەربڕینی پێزانین بۆ ھێزەکان کە دڵسۆزانە ئەرکەکانیان رادەپەڕێنن، چەند بڕیار و راسپاردەیەکیان پێگەیاندن کە پێویستە لەژێر رۆشنایی یاسا بەرکارەکانی ھەرێم کارەکانیان باشتر رێکبخەنەوە و چاوکراوەتربن لەپێناو پاراستنی ئاسایش و ئەمنیەتی ئەو ناوچانە و بەھەموو شێوەیەک رێگری بکەن لە ھەموو ئەوانەی لە دەرەوەی یاسا کاردەکەن.
بڕیاریشدرا ئەولەویەتی کارەکان توندوتۆڵکردنی ئاسایش و پاراستنی ئارامی و سەروماڵی خەڵک و پاراستنی سنوورەکان و کۆنتڕۆڵکردنی ھەر جموجۆڵێک بێت کە زیان بە ئاسایشی ھەرێم و بەرژەوەندییە باڵاکان بگەیەنێت.
