لیژنە هاوبەشەكانی قائیمقامیەتی سلێمانی فرۆشگا و ماركێت و مۆڵەكان ئاگاداردەكاتەوە كە ڕێگەپێدراو نییە نێرگەلە، جگەرەی ئەلیكترۆنی(ڤایب) و ماددە وزە بەخشەكان بە كەسانی خوار ١٨ ساڵ بفرۆشن.
ڕێكان جەمال سەرۆكی لیژنە هاوبەشەكانی قائیمقامیەتی سلێمانی ڕایگەیاند، “هەڵمەتێكیان دەستپێكردووە بۆ ماركێت و فرۆشگاكان بۆ ئەوەی دواجار ئاگاداریان بكەنەوە لەكاتی فرۆشتنی جگەرە و نێرگەلە و جگەرەی ئەلیكترۆنی(ڤایپ)و ماددە وزەبەخشەكان بە كەسانی خوار ١٨ ساڵ نەفرۆشن و ڕێكاری توندی یاساییان بەرامبەر دەگرینەبەرو سزای توند دەدرێن”.
ئاماژەی بۆ ئەوەش كرد، بەپێی یاسا و ڕێنماییە تەندروستییەكان بەكارهێنانی ئەو ماددانە زیانی تەندروستییان هەیە بە تایبەت بۆ كەسانی منداڵ و مێردمنداڵ، هەربۆیە فرۆشتنی بەو كەسانە قەدەغەن.
ڕاشیگەیاندووە، هەر ماركێت یاخود فرۆشگایەك ئەو كارە بكات تووشی سزای توند ماددیی و داخستنی دەكەینەوە و هاوڵاتییانیش دەتوانن لەكاتی هەبوونی گومان، یاخود بۆ گەیاندنی سكاڵا و زانیاری بە قائیمقامیەتی سلێمانی و لیژنە هاوبەشەكان، پەیوەندی بە ژمارە تەلەفونی (07708677777)ـەوە بكەن.
