قوباد تاڵەبانی سەرپەرشتیاری مەکتەبی سکرتارییەتی سەرۆک مام جەلال لە هەولێر پێشوازیکرد لە ئێرڤن هیکس کۆنسوڵی گشتیی ئەمریکا لە هەرێمی کوردستان، لە دیدارێکدا بارودۆخی سیاسیی هەرێمی کوردستان و عێراق و پەرەپێدانی پەیوەندییەکانی نێوان هەرێم و ئەمریکا بە تایبەت لە بواری بازرگانی تاوتوێکران.
لەو کۆبوونەوەیەدا کە ئەمڕۆ پێنجشەممە لە بارەگای مەکتەبی سیاسیی (ی. ن. ک) لە هەولێر بەڕێوەچوو، قوباد تاڵەبانی و کۆنسوڵی گشتیی ئەمریکا، بارودۆخی ئێستای هەرێمی کوردستان و عێراق-یان باسکرد و بە ئاماژەدان بە مەترسییەکانی بەردەم پرۆسەی سیاسیی عێراق، هەردوولا هاوڕابوون بە ڕێگەی گفتوگۆ و دانوستان چارەسەری گونجاو بۆ کێشەکان بدۆزرێتەوە، بە شێوەیەک ڕێگەنەدرێت ناکۆکییەکان وڵات بەرەو ناسەقامگیری زیاتر ببەن.
لە بەشێکی تری کۆبوونەوەکەدا، گرنگیی بەرەوپێشچوونی پەیوەندییەکانی نێوان هەرێم و ئەمریکا لە هەموو بوارەکاندا باسکرا و لەمبارەیەوه سەرپەرشتیاری مەکتەبی سکرتارییەتی سەرۆک مام جەلال داوایکرد پەرە بە پەیوەندییە بازرگانییەکانی نێوان هەردوولا بدرێت بە جۆرێک هانی کۆمپانیا ئەمریکییەکان بدرێت وەبەرهێنانی زیاتر لە هەرێمدا بکەن و پەیوەندیش لە نێوان ژوورە بازرگانییەکانی هەرێم و ئەمریکا دروستبکرێت.
لە تەوەرێکی تری کۆبوونەوەکەدا، کۆنسوڵی گشتیی ئەمریکا پشتگیریی تەواوی وڵاتەکەی بۆ هەرێمی کوردستان دووپاتکردەوە و ستایشی هەوڵەکانی قوباد تاڵەبانیشی کرد بۆ بەگژداچوونەوەی توندوتیژیی خێزانی و داواشی لێکرد لەو بوارەدا بەردەوامبێت و ڕۆڵی کاریگەر و ئەرێنیی خۆی بگێڕێت.
