د. بەرهەم ساڵح سەرۆك كۆماری عێراق، پێشوازیكرد لە قاسم ئەعرەجی ڕاوێژكاری ئاسایشی نەتەوەیی عێراق و بۆردومانكردنی هەرێمی كوردستانی لە لایەن ئێران و توركیاوە تاوتوێكرد.
ئەمشەو د. بەرهەم ساڵح سەرۆك كۆماری عێراق، لە میانەی كۆبوونەوەیدا لەگەڵ قاسم ئەعرەجی ڕاوێژكاری ئاسایشی نەتەوەیی عێراق ڕایگەیاندووە، “بۆردومانەكانی ئێران ئاڵۆزكردنێكی مەترسیدار و قبوڵنەكراون و دەستدرێژین بۆ سەر سەروەریی وڵات و ئاسایش و سەقامگیرییەكەی و پارێزراویی هاوڵاتییانی”.
سەرۆك كۆماری عێراق جەختیكردووەتەوە لەوەی كە بۆردومانەكانی توركیاش بۆ سەر ناوچەكانی هەرێمی كوردستان قبوڵكراونین و پێشێلكردنی سەروەریی عێراقن.
د. بەرهەم ساڵح لە كۆبوونەوەكەدا ڕایگەیاندووە، “دەبێت ئەو هێرشانە ڕابگیرێن و ڕێگریبكرێت لەوەی لێكەوتەی دیكەیان لێبكەوێتەوە”.
