لە كۆبوونەوەی ئەمڕۆی پەرلەمانی كوردستاندا كە بە سەرۆكایەتیی هێمن هەورامی جێگری سەرۆكی پەرلەمان بەڕێوەچوو، كاروان گەزنەیی ئەندامی فراكسیۆنی یەكێتیی نیشتمانیی كوردستان، ڕەخنەی لە كاری پەرلەمان گرت و تۆمەتباریكرد بەوەی كاری گرنگی بۆ هاوڵاتییان نەكردووە و كەوتووەتەژێر ڕكێفی حكومەتەوە، بەڵام وتەكانی بڕدران و لەو بڕگەیەدا كۆتایی بە پەخشی دانیشتنەكەی پەرلەمان هێنرا.
وەك لە گرتە ڤیدیۆییەكەدا دەردەكەوێت، كاروان گەزنەیی ئەندامی فراكسیۆنی یەكێتیی نیشتمانیی كوردستان لە پەرلەمانی كوردستان، ڕەخنە لە پەرلەمان و كارەكانی دەگرێت بەوەی دوای چوار ساڵ لە تێپەڕبوونی تەمەنی ئەم خوولەی پەرلەمان، وەك پێویست خزمەتی هاوڵاتییانی نەكردووە.
پەرلەمانتارەكەی ی. ن. ك دەڵێت، “پەرلەمان جگە لە دەركردنی چەند یاسایەكی پەرلەمان و یاساكانی تایبەت بە حكومەت، هیچی تری نەكردووە و كەوتووەتەژێر ڕكێفی وەزیرەكانەوە”.
كاروان گەزنەیی ڕووی قسەكانی لە سەرۆكی دانیشتنەكەی پەرلەمان كرد و وتی، “پەرلەمان فەرمانگەیەكە لە حكومەتی هەرێمی كوردستان، یاخود دامەزراوەیەكی سەربەخۆیە؟!”.
ڕاشیگەیاند، “دەیان بابەتی گشتی و گرنگ هەن لە هەرێمی كوردستان وەك مووچە و پلەبەرزكردنەوە و پرسی فەرمانبەرانی گرێبەست، كەچی پەرلەمان كاری لەسەر نەكردوون”.
لە درێژەی قسەكانی پەرلەمانتارەكەدا، ڕاگەیاندنی پەرلەمان پەخشی دانیشتنەكەی پەرلەمان و وتەكانی پەرلەمانتارەكەی ڕاگرت و لە ناڕەزایەتیی ئەو كارەدا، كاروان گەزنەیی ڕایگەیاند، ئەوان قسەی خەڵك دەكەن و بابەتەكان گرنگن و پەیوەستن بە مافی خەڵكەوە، چۆن دەبێت وتەكانی ببڕدرێن؟!.
