ئەنتۆنی بلینکن وەزیری دەرەوەی ئەمریکا نیگەرانیی لە وەڵامی ئێران بۆ زیندوکردنەوەی ڕێککەوتنی ئەتۆمی ڕاگەیاند دەڵێت، “وەڵامەکانی ئێران بۆ پێشنیازی یەکێتیی ئەوروپا لەوبارەیەوە دڵخۆشکەر نین”.
لە کۆنگرەیەکی ڕۆژنامەوانیدا ئەنتۆنی بلینکن ڕایگەیاند، “وەڵامەکەی ئێران بۆ زیندوکرنەوەی ڕێککەوتنی ئەتۆمی وا دەکات گەیشتن بە ڕێککەوتن دووربکەوێتەوە”.
بلینکن وتی، “ئێمە بە ڕوونی مەبەستی خۆمان لەبارەی ڕێککەوتنەوە خستەڕوو، تەنها ئامانجی ئێمە ئەوەیە ئێران چەکی ئەتۆمیی نەبێت”.
پێشتر کۆشکی سپی ڕایگەیاندبوو، کە ئەمریکا ئامادەیە بۆ هەموو سیناریۆکانی پەیوەست بە سەرکەوتن یان شکستی ڕێککەوتنی ئەتۆمی.
ئەمە لەکاتێکدا یەکێتی ئەوروپا لە مانگی ئابی ئەمساڵدا، دوای دانوستانێکی درێژخایەن و ئاڵۆز کە لە نیسانی ساڵی ڕابردووەوە لە ڤییەن دەستی پێکرد و 16 مانگی خایاند، دەقێکی کۆتایی پێشکەش کردبوو بۆ تێپەڕاندنی چەقبەستوویی لە زیندووکردنەوەی ئەم ڕێککەوتنەدا.
بەڵام گفتوگۆکان چەند مانگێک لەمەوبەر بەهۆی پێداگریی ئێران لەسەر چەند داواکارییەک، لەوانە دوورخستنەوەی سوپای پاسداران لە لیستی تیرۆری ئەمەریکا و ڕاگرتنی لێکۆڵینەوەکانی ڕێکخراوی نێودەوڵەتیی وزەی ئەتۆم سەبارەت بە دامەزراوە ئەتۆمییە ڕانەگەیەندراوەکانی ئێران کێشەی تێکەوت.
