قائیمقامیەتی سلێمانی دەستیگرت بەسەر بڕێکی زۆر ئارد و پێداویستیی خۆراکیی دیکەدا کە لە کۆگایەکی گەڕەکی هاوکاری هەڵگیرابوون، لێکۆڵینەوە لە مەبەستی بەکارهێنانی ئەو خۆراکانە دەکرێت.
لیژنەکانی قائیمقامیەتی سلێمانی لە گەڕەکی هاوکاریی سلێمانی، دەستیگرت بەسەر بڕێکی زۆر ئارد، برنج، زەیت و خۆراکیی دیکەدا، کە لە کۆگایەکدا بەشێوەی نەشیاو و ناتەندروست هەڵگیرابوون.
ئەو خۆراکانە قرتێنەر و مێروویان تێدابووە و شیاونەبوون بۆ خواردن و بەکارهێنان.
خاوەنی کۆگاکە دەڵێت، ئەو کەرەستانەی بۆ ئالیکی ئاژەڵ هەڵگرتووە، بەڵام بەپێی ڕێنماییە تەندروستییەکان هەر خۆراکێک بۆ خواردنی مرۆڤ شیاو نەبێت بۆ ئاژەڵیش شیاو نابێت و نابێت بەکاربهێنرێت.
