دەیڤد كای، شارەزای چەكی ئەتۆمی كە لە عێراق بە دوای چەكە كیمیایی و كۆكوژەكانی ڕژێمەكەی سەدام حسێن-ـدا دەگەڕا، لە تەمەنی 82 ساڵیدا كۆچی دوایی كرد.
مردنەكەی كای لە 13ی ئەم مانگەدا بووە، بەڵام تازە بە فەرمیی ڕادەگەیەندرێت و هاوژینەكەی بە میدیای ئەمریكیی وتووە، ناوبراو بە نەخۆشی گیانیلەدەستداوە.
لە كۆتایی نەوەدەكانی سەدەی ڕابردوودا، كۆمەڵگەی نێودەوڵەتی بەرئەنجامی بەڵگەكانی بۆردومانكردنی كوردستان بە چەكی كیمیایی و بوونی وێستگەی ئەتۆمی لە عێراقدا، هەڵمەتێكیان بۆ گەڕان بە دوای چەكی كۆمەڵكوژی ڕژێمی بەعسدا بەرپاكرد و تا ماوەیەك پێش ڕووخاندنی ڕژێمەكە لە ساڵی 2003دا، هەڵمەتەكە بەردەوام بوو.
لەو ماوەیەدا چەندین پسپۆڕی خۆرئاوا لە ئاژانسی نێودەوڵەتیی وزەی ئەتۆم و نەتەوە یەكگرتووەكان، وەك پشكنەر سەردانی عێراقیان كرد و دەوترا حكومەتی عێراق چەكە كۆكوژەكانی دەشارێتەوە و جێگۆڕكێیان پێدەكات، یەكێك لەو پسپۆڕانەی سەرۆكایەتیی تیمی پشكنەرانیان دەكرد، دەیڤد كای شارەزا ئەمریكییەكەی چەكی ئەتۆمی بوو.
