ئەنجومەنی باڵای دادوەری دەستبەكاركردنەوەی سەرجەم دادگاكان لە سبەینێوە ڕادەگەیەنێت.
ئەنجومەنەكە لە ڕاگەیەندراوێكدا دەڵێت، بەهۆی كشانەوەی خۆپیشاندەران و لاچوونی ئەو گەمارۆیەی لەسەر بینای ئەنجومەنی باڵای دادوەری و دادگای باڵای فیدراڵی هەبوو، بڕیاردرا بە دەستبەكاركردنەوە بەشێوەیەكی سروشتی لە سەرجەم دادگاكاندا لە بەیانی سبەی 8/24ەوە.
ئەنجومەنەكە سوپاسی سەرجەم لایەنەكان، كەسایەتییە ناوخۆیی و نێودەوڵەتییەكان دەكات ئەوانەی پاڵپشتیی دادگانن و سوورن لەسەر ڕێچكەی سەروەریی یاسا و ڕێزگرتن لە دەستوور.
ئەنجومەنی دادوەری جەختدەكاتەوە لەسەر هەنگاونان بە گرتنەبەری ڕێوشوێنە یاساییەكان بەرامبەر هەموو ئەوانەی سەرپێچیی یاسا دەكەن و دامەزراوە گشتییەكان پەكدەخەن.
ڕاگەیەندراوەكە لەكاتێكدایە ئێوارەی ئەمڕۆ ساڵح محەمەد عێراقی كە بە وەزیرەكەی سەدر ناسراوە داوای لە شوێنكەوتووانی ڕەوتی سەدر كرد لە بەردەم ئەنجومەنی دادوەری بكشێنەوە و خێمەكانیان لە بەردەم ئەنجومەنی نوێنەرانی عێراق بهێڵنەوە.
بەیانی ئەمڕۆ لە كۆبوونەوەیەكی ئەنجومەنەكە لەگەڵ دادگای فیدراڵی بڕیاردرا كارەكانی دادگاكانی سەر بە دەسەڵاتی دادوەری و دادگای فیدراڵی ڕابگیرێن.
هۆكاری بڕیارەكەشی گەڕاندەوە بۆ خۆپیشاندانی لایەنگرانی ڕەوتی سەدر لە بەردەم ئەنجومەنی دادوەری و ئەو هەڕەشانەی لە دەسەڵاتی دادوەری كراون، تا پەرلەمان هەڵبوەشێننەوە.
