بەڕێوەبەرایەتیی ئاسایشی سلێمانی ڕایدەگەیەنێت، بە بڕیاری دادوەر پێنج بازرگان و دەڵاڵ كە بە ڕێكاری نایاسایی مامەڵەیان بە زەوی و زار و موڵكی گشتییەوە كردووە دەستگیركراون، دەیان لێپرسراو و فەرمانبەری دامەزراوە كارگێڕییەكان و چەندین كەسیش كە وەك بریكار و دەڵاڵی زەوی و زار مامەڵەی نایاساییان ڕاییكردووە بڕیاری دەستگیركردنیان بۆ دەركراوە.
هەر لە ڕاگەیەندراوەكەدا هاتووە ، “بۆ هەموو لایەكی ڕووندەكەینەوە ئەو كەسانەی بڕیاری دەستگیركردنیان بۆ دەرچووە پۆست و دەسەڵاتی خۆیان لە فەرمانگە حكومییەكان بۆ كاری نایاسایی و دوور لە ڕێنماییەكان و ڕەوشتی بەرزی فەرمانبەری بەكارهێناوە و لە بەرامبەر ڕەشوە مامەڵەی خەڵكی تریان تێپەڕاندووە و چەندین دۆسیەی زەوی و زار و موڵكی گشتییان لە دەرەوەی یاسا بەركارەكانی ھەرێم داگیركردووە، بەكرێگیراوبوون و لە بەرامبەر بڕە پارەیەكدا ئەو كارانەیان ئەنجامداوە”.
