تەنها لە ئەمساڵدا لە كامپی هۆل 14 حاڵەتی كووشتن تۆماركراون، هەندێكیان حاڵەتی سەربڕین بوون، مەترسی ئەوە هەیە كامپەكە ببێتە مۆڵگەی داعش.
بەگوێرەی هەواڵێكی ئەی ئێف پی-ی فەڕەنسی كە پشتی بە زانیارییەكانی لایەنە فەرمییە كوردییەكانی ڕۆژئاوای كوردستان بەستووە، لە سەرەتای ئەمساڵەوە تا ئێستا 14 حاڵەتی كووشتن لەنێو كامپی هۆل تۆماركراون.
ئەوەش ئاشكراكراوە، لەو 14 حاڵەتی كووشتنە سێ-یان سەریان بڕاوە و ئەوانەی دیكەش بە دەمانچەی بێدەنگ كوژراون.
ئەو كەسانەی كوژراون، 10 كەسیان بە ڕەگەز عێراقی بوون و چوارەكەی دیكەشیان سوری بوون.
ئەوەش لەكاتێكدایە كە مانگی پێشوو نەتەوەیەكگرتووەكان هۆشداری دا لەوەی، ڕەنگە بارودۆخی ئەمنیی كامپەكە لەدەست دەربچێت.
كامپی هۆل 62 هەزار كەسی تێدایە، 80%یان ژن و منداڵن و كەسوكاری چەكدارانی داعشن، كامپەكەش لەژێر دەسەڵاتی هەسەدەیە.
