ڕاگەیاندنی هەپەگە دیمەنی چالاكییەكی گەریلاكانی پەكەكەی بڵاوكردەوە و دەڵێت، لە كانی ماسێ ئەنجامدراوە و بەهۆیەوە هەشت سەربازی توركیا كوژراون.
ناوەندی ڕاگەیاندن و چاپەمەنی هێزەکانی پاراستنی گەل (هەپەگە) ڕایگەیاند، هێزەكانیان لە كاتژمێر 6ی ئێوارەی 24ی حوزەیران بە چەکی قورس لە دژی سەنگەری (کانی ماسێ)ی سوپای توركیا لە مەتینا چالاکییان ئەنجامدا و لە ئاكامیدا هەشت سەرباز كوژرا و چادرێكیشیان لەناوبرا.
لەلایەكی دیكەوە ئاژانسی هەواڵی فورات نیوز بڵاویکردەوە، شەوی ڕابردوو گەریلاکانی هەپەگە لە هەرێمەکانی پاراستنی مەدیا هەلیکۆپتەرێکی سکۆرسکیی سوپای تورکیایان کردووەتە ئامانج و خراوەتەخوارەوە.
ئاماژەی بەوەشكرد، بڕیارە ناوەندی ڕاگەیاندنی هەپەگە ڕاگەیەندراوێك لەبارەی ئەو چالاكییەوە بڵاوبكاتەوە.
