لە سوریا و ڕۆژئاوای کوردستان دەردە سەگ بڵاوبووەتەوە، زۆرترین ژمارەی تووشبووانیش لە دیمەشق، دێرەزوور و سوەیدا تۆمارکراون.
پسپۆڕانی تەندروستی لە سوریا باس لەوەدەکەن، بڵاوبوونەوەی زۆری نەخۆشییەکە بۆ هەرەسهێنانی کەرتی تەندروستی و کەمی خزمەتگوزارییە پزیشکییەکان دەگەڕێتەوە، هەروەها کەموکورتییەکی زۆر لە چارەسەرەکانی نەخۆشیی دەردە سەگدا هەیە.
بەوپێیە یەکێکی دیکە لە هۆکارەکانی بڵاوبوونەوەی زۆری نەخۆشییەکە بەرزبوونەوەی نرخی دەرمان و چارەسەرەکانییەتی، بەتایبەت دەرزیی نەخۆشییەکە، کە یەک ژەمی بۆ 50 هەزار لیرەی سوری بەرزبووەتەوە کە دەکاتە (13 دۆلار)، لەگەڵئەوەشدا نەبوونی چاودێریی حکومەت بۆ ئاژەڵەکان و داخستنی ئەو شوێنانەی تایبەتن بە پاراستن و چاودێریکردنی ئاژەڵان هۆکاری دیکەی بڵاوبوونەوەی نەخۆشییەکەن.
ڕۆژنامەی فەرمیی وڵاتی سوریا کە لە دیمەشق دەردەچێت ڕایگەیاندووە، بەمەبەستی چارەسەرکردن و لە کۆنترۆڵ دەرنەچوونی نەخۆشییەکە ناوەندی چارەسەرکردنی دەردە سەگ کە سەر بە وەزارەتی تەندروستییە کاردەکات و چارەسەری تووشبووان دەکات، ماوەی چارەسەری نەخۆشییەکەش دوو هەفتە دەخایەنێت.
بەپێی داتاکانی وەزارەتی تەندروستیی سوریا، ژمارەی تووشبووانی نەخۆشیی دەردە سەگ لە شاری سوەیدا 291 تووشبوو، لە دێرەزووری ڕۆژئاوای کوردستانیش ژمارەیان دەگاتە 238 کەس.
