بەرپرسێكی وەزارەتی دەرەوەی عێراق ڕایدەگەیەنێت، هیچ ڕێككەوتنێكی ئەمنی و سەربازیمان لەگەڵ توركیادا نییە و بڕیاریشدراوە لیژنەیەكی مەیدانی سەردانی زاخۆ بكات بۆ بەدواداچوونی زیاتر لەسەر ڕووداوەكە.
ئەمڕۆ شەممە، ئەنجومەنی نوێنەرانی عێراق بە ئامادەبوونی وەزیرانی دەرەوە و بەرگری لەبارەی هێرشەكانی توركیا بۆ سەر خاكی عێراق كۆبووەوە و بڕیاری پێكهێنانی لیژنەیەكی مەیدانیدا بەمەبەستی بەدواداچوون بۆ وەرگرتنی زانیاریی زیاتر لەسەر تۆپبارانكردنەكەكەی ناوچەیەكی گەشتیاریی زاخۆ كە زیاتر 25 گەشتیار ڕۆژی چوارشەممەی ڕابردوو شەهید و برینداربوون.
هاوكات ئەحمەد سەحاف، وتەبێژی وەزارەتی دەرەوەی عێراقیش ڕایگەیاند، هیچ ڕێككەوتنێكی ئەمنی وسەربازیمان لەگەڵ توركیادا نییە كە خاكی عێراق ببەزێنێت و هاوڵاتییانی سڤیل بكاتە ئامانج.
ڕاشیگەیاند، حكومەتی عێراق كاربەڕێكەری كاروباری باڵیۆزخانەكەی لە ئەنكەرە بانگهێشتكردووەتەوە بۆ ئەوەی لەسەر دوایین پێشهات و گۆڕانكارییەكان قسەی لەگەڵدا بكرێت
