ئەمیبا بە مەترسیدارترین جۆری مشەخۆر (پاراسایت) دادەنرێت بۆ سەر تەندروستیی مرۆڤ، ئەو مشەخۆرە بە “مێشکخۆر” ناودەبرێت لەبەرئەوەی لەڕێگەی ئاوەوە دەچێتە لوتەوە و لەوێوە بۆ مێشک و ناوەندی کۆئەندامی دەمار.
ئەمیبا کە دەگاتە مێشک وەک مشەخۆرێک لەسەر خانەکانی مێشک دەژی و کەسی هەڵگر تووشی هەوکردنی ئەمیبیی سەرەتایی لە مێشکدا دەبێت.
نیشانەکانی کەسی هەڵگری مشەخۆری ئەمیبا و تووشبوو بە هەوکردنی ئەمیبی، سەرئێشەی توند، تا، ڕشانەوە.
لە قۆناغی دووەمدا نیشانەکانی دەگۆڕێن بۆ ڕەقبوونی ماسولکەکانی شان و مل، هەروەها تێکچوونی بینین بە ڕادەیەکی زۆر، لەگەڵ ئەگەری چوونە دۆخی بێئاگایی “کۆما”.
لەم دواییانەدا ئەمیبای مێشکخۆر لە هەشت شاری ویلایەتی تەکساس و باشووری خۆرئاوای هیوستن و باکووری فلۆریدا بڵاوبووەتەوە.
تاقیکردنەوەکان دەریانخستووە، مشەخۆرەکە لە تۆڕی ئاوی گشتیی تەکساسدا بوونی هەیە و ئامۆژگاریی خەڵک کراوە ئەو ئاوە بۆ خواردنەوە بەکارنەهێنن.
یۆشا ماکنتایر یەکێکە لەو کەسانەی بەوهۆیەوە گیانیلەدەستداوە و تەمەنی ئەو منداڵە تەنها شەش ساڵ بووە، دوای ڕووداوەکە ئەمیبا لە ئاوی ماڵەکەیاندا هەبووە.
